राष्ट्रिय स्वतन्त्र पार्टी (रास्वपा) को नयाँ नेतृत्वका लागि भोलीदेखि निर्वाचन प्रक्रिया सुरु हुने भएको छ । केन्द्रीय निर्वाचन आयोगले नयाँ नेतृत्वका लागि निर्वाचन कार्य तालिका सार्वजनिक गरेको हो । आयोगले सार्वजनिक गरेको तालिका अनुसार उम्मेदवारी मनोनयनका लागि भोली दिउँसो १ बजेदेखि वितरण हुने उम्मेदवारी मनोनयनपत्र दिउँसो २ बजेदेखि ४ बजेसम्म दर्ता हुनेछन् ।
उम्मेदवारहरूको प्रारम्भिक नामावली बेलुका ६ बजे सार्वजनिक भएपछि उम्मेदवारविरुद्ध दाबी तथा विरोध दर्ता गर्ने समय भोलि बेलुका ६ बजेदेखि ७ बजेसम्म तोकिएको छ । दाबी तथा विरोध परेका उम्मेदवारबारे जाँचबुझ बेलुका ७ बजेदेखि ९ बजेसम्म गरिनेछ भने उम्मेदवारी फिर्ता लिने अन्तिम समय राति सवा ९ बजेसम्म निर्धारण गरिएको छ ।
कार्य तालिकाअनुसार पार्टी सभापति तथा केन्द्रीय सदस्यको निर्वाचनका लागि पहिलो चरणको मतदान पर्सि असार ९ गते बिहान साढे ८ बजेदेखि दिउँसो ३ बजेसम्म सञ्चालन हुनेछ । महाधिवेशनमा सभापति पदका लागि ५१ हजार र अन्य पदाधिकारीका लागि ४१ हजार रुपैयाँ उम्मेदवारी शुल्क तोकिएको छ । केन्द्रीय सदस्यको उम्मेदवारी शुल्क २१ हजार रुपैयाँ तोकिएको छ ।
सभापतिका लागि १ जना प्रस्तावक र ५१ जना समर्थक रहनुपर्ने निर्वाचन आयोगले जनाएको छ । त्यस्तै, पदाधिकारीका लागि १ जना प्रस्तावक र २१ जना समर्थक चाहिनेछ । केन्द्रीय सदस्यका लागि १ जना प्रस्तावक र २१ जना समर्थक रहनुपर्ने रास्वपाले जनाएको छ । मतगणना तथा मत परिणामको घोषणा मतदान सम्पन्न भएको दुई घण्टापछि गरिने तालिकामा उल्लेख छ ।
