काठमाडौं । श्रम संस्कृति पार्टीका अध्यक्ष हर्क साम्पाङले पूर्वप्रधानमन्त्री डा। बाबुराम भट्टराई नयाँ राष्ट्रपति बन्न सक्ने अनुमान लगाएका छन् । भट्टराईले आफूलाई रास्वपाबाट कुनै ललिपपको आशा नरहेको अभिव्यक्ति दिएकै भोलिपल्ट साम्पाङले यस्तो अनुमान गरेका हुन् ।
रास्वपाको चितवनमा सुरू भएको महाधिवेशनमा भट्टराई अतिथि बनेर पुगेका थिए । उद्घाटन समारोहमा भाषण गर्दै उनले ‘आफू जीवनभर मर्न हिँडेको’ भन्दै कुनै ललिपप नखाने बताएका थिए । रास्वपाले भट्टराईलाई राष्ट्रपति बनाउन सक्ने चर्चा पहिल्यैदेखि चल्दै आएको सन्दर्भमा उनले सो अभिव्यक्ति दिएका हुन् ।
साम्पाङले भने सामाजिक सञ्जालमा आज स्टाटस लेख्दै भनेका छन्- अब नयाँ राष्ट्रपति बाबुराम भट्टराई बन्न सक्छन् !’
त्यसो त साम्पाङ सामाजिक सञ्जालमा मनगढन्ते र हावादारी टिप्पणीहरू गर्न माहिर छन् । उनको यो स्टाटसलाई धेरैले हावामा उडाएका छन् ।
