काठमाडौं – नेकपा एमालेले संसदीय दल र सचिवालयको बैठक बोलाएको छ । हिजो पार्टी उपाध्यक्ष विष्णुप्रसाद पौडेललाई सम्पत्ति शुद्धीकरणको मुद्दामा सुर्खेतबाट पक्राउ गरिएपछि त्यसबारे धारणा बनाउन छुट्टाछुट्टै बैठक बोलाइएको हो ।
संसदीय दलको बैठक मंगलार दिउँसो २ बजे च्यासलस्थित पार्टी केन्द्रीय कार्यालयमा र साँझ ६ बजे पार्टीको अध्यक्ष केपी ओली निवास गुण्डुमा सचिवालय बैठक पनि बोलाएको हो । बैठक उपाध्यक्ष पौडेल पक्राउ प्रकरणबारे केन्द्रित हुने बताईएको छ ।
त्यसबाहेक बैठकमा समसामयिक राजनीतिबारे पनि छलफल हुने बताईएको छ । यसअघि एमालेले उपाध्यक्ष पौडेलको गिरफ्तारीविरुद्ध एमालेले राजनीतिक प्रतिवाद गर्ने निर्णय गरिसकेको छ । एमालेले पौडेल पक्राउलाई प्रतिशोधपूर्ण भन्दै सस्तो लोकप्रियताका लागि सरकारको निर्देशनमा यो कार्यको कानुनी र राजनीतिक रूपमा दृढतापूर्वक प्रतिवाद गरिने जनाएको हो ।
पौडेललाई सुर्खेतबाट गिरफ्तार गरिएको घटनालाई सरकारको ‘अराजनीतिक, अलोकतान्त्रिक र नाङ्गो प्रतिशोधको पराकाष्ठा’ भन्दै एमालेले कडा विरोध जनाएको छ । पार्टी अध्यक्ष केपी शर्मा ओलीद्वारा जारी प्रेस वक्तव्यमा पौडेलको गिरफ्तारीलाई गैरकानुनी, बदनियतपूर्ण र राजनीतिक प्रतिशोधबाट प्रेरित कदमका रूपमा चित्रित गरिएको छ ।
साङ्गठनिक कार्यक्रमका शिलशिलामा सुर्खेतमा रहेका पौडेललाई सरकारले ‘अपहरणको शैलीमा’ गिरफ्तार गरेको एमालेको दाबी छ ।
