राष्ट्रिय स्वतन्त्र पार्टी (रास्वपा) का नवनिर्वाचित सभापति रवि लामिछानेले प्रथम राष्ट्रिय महाधिवेशनले पार्टीलाई राजनीतिक रूपमा परिपक्व र वैधानिक बनाएको बताएका छन् । हिजो सम्पन्न शपथग्रहण तथा समापन समारोहलाई सम्बोधन गर्दै लामिछानेले रास्वपाले परिपक्व राजनीति गर्न नसकेका केही अवस्था रहेको स्वीकार गर्दै त्यसलाई गलत नियतका रूपमा नबुझ्न आग्रह गरेका हुन् ।
सभापति लामिछानेले महाधिवेशनले पार्टीमाथि लाग्दै आएका विभिन्न राजनीतिक आरोपको जवाफ दिएको दाबी गर्दै रास्वपा विचारविहीन दल भएको आरोपसमेत खारेज भएको जिकिर गरे । उनले पार्टी अब थप वैचारिक रूपमा स्पष्ट, व्यवस्थित र जिम्मेवार राजनीतिक शक्तिका रूपमा अघि बढ्ने विश्वास व्यक्त गरे ।
रास्वपाको राजनीतिक उपस्थितिबाट कुनै पनि राजनीतिक शक्ति भयभित हुनुनपर्ने भन्दै लामिछानेले लोकतान्त्रिक गणतन्त्र, संवैधानिक व्यवस्था र शक्ति पृथकीकरणको सिद्धान्तप्रति पार्टी पूर्ण रूपमा प्रतिबद्ध रहेको पनि बताए । शासकीय सुधारका विषयमा आफूहरूको फरक दृष्टिकोण भए पनि वर्तमान व्यवस्थाभित्रै रहेर मुलुकका समस्या समाधानका लागि संघर्ष गर्ने प्रतिबद्धता पनि लामिछानेले व्यक्त गरे ।
अघिल्ला राजनीतिक दलहरूले जस्तै प्रतिशोधको राजनीति रास्वपाले नअपनाउने स्पष्ट पार्दै सबै राजनीतिक दलको अस्तित्वलाई सम्मान गर्ने लामिछानेको भनाई छ । महाधिवेशनका क्रममा आमन्त्रित विभिन्न राजनीतिक दलका प्रतिनिधिहरूप्रति भएको असहज व्यवहारप्रति क्षमायाचना गर्दै त्यो नियतवश नभएको पनि उहाँले स्पष्ट पारे ।
