काठमाडौँ । डोल्पाको शे (फोक्सुण्डो गाउँपालिका–८ स्थित फोक्सुण्डो खोलाकोबीच भागमा अड्किएको अवस्थामा रहेको शव दुई दिनको अथक प्रयासपछि बाहिर निकालिएको छ ।
नेपाली सेनाको संग्राम शार्दुल गुल्मबाट खटिएको विशेष टोलीले नेपाल प्रहरी, सशस्त्र प्रहरी बल नेपाल र स्थानीय बासिन्दाहरूको संयुक्त प्रयासमा सोमवार बिहान उक्त शव खोँचबाट निकाल्न सफल भएको हो ।
खोलाकोबीच भाग र अत्यन्तै कठिन भौगोलिक सहनावट (खोँच) मा शव अड्किएकाले उद्धार कार्य निकै चुनौतीपूर्ण बनेको थियो । सुरक्षा निकाय र स्थानीयको निरन्तरको दुई दिने अथक प्रयास र समन्वयपछि मात्र शवलाई सुरक्षित रूपमा बाहिर निकाल्न सकिएको उद्धार टोलीले जनाएको छ ।
मृतकको पहिचान र घटनाबारे थप अनुसन्धान भइरहेको प्रहरीले जनाएको छ ।
