चितवन। वर्षायाम सुरु भएसँगै नारायणगढ–मुग्लिन सडकखण्डमा सम्भावित पहिरोका कारण सडक अवरुद्ध हुन नदिन आवश्यक उपकरण र जनशक्ति तयारी अवस्थामा राखिएको छ।
सडक डिभिजन कार्यालय भरतपुरले आफ्नो कार्यक्षेत्रअन्तर्गत पर्ने नारायणगढ–मुग्लिन सडकखण्ड तथा कालीगण्डकी करिडोरमा पहिरोको जोखिमलाई मध्यनजर गर्दै उपकरण अपरेटरसहित तयारी अवस्थामा राखेको जनाएको छ।
कार्यालयका प्रमुख सिनियर डिभिजनल इन्जिनियर नारायण लामिछानेका अनुसार वर्षात्का बेला पहिरो खस्ने जोखिम भएका स्थानमा सडक अवरुद्ध हुन सक्ने भएकाले तत्काल सञ्चालनमा ल्याउन आवश्यक उपकरण व्यवस्थापन गरिएको हो।
उनका अनुसार मुग्लिन क्याम्पमा एक लोडर तथा सेती दोभान क्याम्पमा एक एक्स्काभेटर, एक लोडर र एक ब्याकहोलोडर तयारी अवस्थामा राखिएको छ। त्यसैगरी सडक डिभिजन कार्यालय परिसरमा एक ब्याकहोलोडर र कालीगण्डकी करिडोरमा एक लोडर पनि तयारी अवस्थामा छन्।
पहिरोका कारण सडक अवरुद्ध भएमा तत्काल हटाएर सवारी आवागमनलाई नियमित र सहज बनाउन उपकरण अपरेटरसहितको टोली चौबीसै घण्टा तयारी अवस्थामा रहेको कार्यालयले जनाएको छ।
काठमाडौं प्रवेश गर्ने मुख्य राजमार्गका रूपमा रहेको नारायणगढ–मुग्लिन सडक वर्षायाममा लेदोसहितको पहिरो र हिउँदमा सुक्खा पहिरोका कारण पटकपटक अवरुद्ध हुने गर्दछ। यस सडकबाट दैनिक १० हजारभन्दा बढी सवारी साधन आवतजावत गर्ने गरेका छन्।
