काठमाडौँ । इरानको इस्लामिक रिभोलुसनरी गार्ड कोर्प्स (आईआरजीसी)ले अनधिकृत मार्ग प्रयोग गरेर होर्मुज जलघाँटी पार गर्न खोजेको एक जहाजमाथि चेतावनीस्वरूप गोली चलाएपछि जलमार्ग अर्को सूचना नभएसम्मका लागि बन्द गरिएको घोषणा गरेको छ।
आइतबार बिहान स्थानीय समयअनुसार आईआरजीसीको नौसैनिक शाखाले जारी गरेको विज्ञप्ति, जसलाई आईआरजीसीसँग निकट मानिने अर्धसरकारी तस्निम समाचार एजेन्सीको अरबी संस्करणले प्रकाशित गरेको छ, त्यसमा विदेशी शक्तिहरूको हस्तक्षेपका कारण अवस्था थप संवेदनशील बनेको आरोप लगाइएको छ।
विज्ञप्तिअनुसार केही जहाजहरूले ‘अनधिकृत मार्ग’ प्रयोग गरेर जलमार्ग पार गर्ने प्रयास गरेका थिए। तीमध्ये एक जहाजलाई रोक्न आईआरजीसीले चेतावनीस्वरूप गोली चलाएको जनाएको छ।
आईआरजीसीले भनेको छ, ‘बाह्य पक्षहरूको गैरकानुनी हस्तक्षेपका कारण उत्पन्न संवेदनशील अवस्थालाई ध्यानमा राख्दै होर्मुज जलघाँटी अर्को सूचना नभएसम्म तथा अमेरिकाको क्षेत्रीय हस्तक्षेप अन्त्य नभएसम्म बन्द रहनेछ। कुनै पनि जहाज वा नौसैनिक साधनलाई यो जलमार्ग पार गर्न अनुमति दिइने छैन।’
यसैबीच, अमेरिकी राष्ट्रपति डोनाल्ड ट्रम्पले शुक्रबार अमेरिका र इरानबीच युद्धविरामसम्बन्धी वार्ता जारी रहने संकेत दिएका थिए। उनले युद्धविराम कायम रहे पनि अमेरिकाले इरानमाथि सैन्य आक्रमण जारी राखेको अवस्थामा पनि वार्ता अघि बढ्ने बताएका थिए।
