काठमाडौँ । मकवानपुरको हेटौँडा उपमहानगरपालिका–१७ हटियास्थित कर्रा खोलामा आएको बाढीले सोमबार बिहान एउटा खाली ट्रक बगाएको छ।
प्रहरीका अनुसार बिहान करिब ७:४५ बजे शिवम् सिमेन्ट फ्याक्ट्री नजिक खोला तर्न ह्युमपाइप राखेर बनाइएको कल्भर्ट (लच्का) माथिबाट पानीको बहाव अचानक बढेपछि सिमेन्ट फ्याक्ट्रीमा ढुंगा अनलोड गरेर फर्कँदै गरेको ना ७ ख ७६५ नम्बरको १२ चक्के आइचर ट्रक बगाएको हो।
ट्रकसँगै बगेका चालक चितवनको रत्ननगर नगरपालिका–१३ निवासी ३४ वर्षीय दीपक थिङ भने पौडिएर सकुशल बाहिरिन सफल भएका छन्। उनको खुट्टामा सामान्य चोट लागेको छ र हेटौँडा उपमहानगरपालिका–६ चौघडास्थित एक मेडिकलमा उपचार भइरहेको प्रहरीले जनाएको छ।
प्रहरीका अनुसार बाढीले बगाएको ट्रकलाई खोलाबाट निकाल्ने प्रयास भइरहेको छ।
