काठमाडौँ । सिंहदरबारको मुख्य प्रवेशद्वार अगाडिबाट पक्राउ परेका विद्यार्थी नेताहरूलाई बिना सर्त तत्काल रिहा गर्न ११ विद्यार्थी संगठनले सरकारसँग माग गरेका छन्।
अनेरास्ववियुका अध्यक्ष दीपक धामीसहित ६ जना विद्यार्थी नेता बुधबार बिहान सिंहदरबार गेटअगाडि ‘राज्य आतंक बन्द गर’ भन्ने नारासहित सांकेतिक प्रदर्शन गरिरहेका बेला प्रहरीले नियन्त्रणमा लिएको थियो।
घटनापछि विभिन्न राजनीतिक दल निकट ११ विद्यार्थी संगठनले संयुक्त विज्ञप्ति जारी गर्दै शान्तिपूर्ण प्रदर्शनमा सहभागी विद्यार्थी नेताहरूको पक्राउप्रति आपत्ति जनाएका छन्। विज्ञप्तिमा आलोचनात्मक आवाजलाई नियन्त्रण गर्ने प्रयास लोकतान्त्रिक मूल्य–मान्यता र नागरिक स्वतन्त्रताविपरीत रहेको उल्लेख गरिएको छ।
संगठनहरूले राज्यद्वारा सिर्जित दमनको सांकेतिक विरोध गर्न खोज्ने विद्यार्थीमाथि गरिएको धरपकडको भर्त्सना गर्दै पक्राउ परेका सबै नेताहरूलाई बिना सर्त तत्काल रिहा गर्न माग गरेका छन्।
साथै, दमनात्मक गतिविधि नरोकिए थप आन्दोलनका कार्यक्रम घोषणा गर्न बाध्य हुने चेतावनी पनि उनीहरूले दिएका छन्।
संयुक्त विज्ञप्तिमा नेपाल विद्यार्थी संघकी अध्यक्ष करुणा कटुवाल, अनेरास्ववियुकी महासचिव अन्जना सिवाकोटी, अनेरास्ववियु (क्रान्तिकारी) का अध्यक्ष विजयप्रकाश शर्मा सापकोटा, अनेरास्ववियुका अध्यक्ष महेश श्रेष्ठलगायत ११ विद्यार्थी संगठनका प्रतिनिधिहरूको हस्ताक्षर रहेको जनाइएको छ।
