धनगढी । सुदूरपश्चिम प्रदेशमा नेपाली कम्युनिस्ट पार्टी (नेकपा) संसदीय दलको बैठक आज केहीबेरमा बस्दैछ। बैठक संसदीय दलको कार्यालयमा हुने र प्रदेशको पछिल्लो राजनीतिक अवस्था तथा सत्ता समीकरणबारे छलफल केन्द्रित रहने जनाइएको छ।
बुधबार मुख्यमन्त्री कमलबहादुर शाहले एमालेबाट नियुक्त मन्त्रीहरूलाई बर्खास्त गरेपछि एमालेले सरकारलाई दिएको समर्थन फिर्ता लिएको थियो। त्यससँगै मुख्यमन्त्री शाह अल्पमतमा परेका छन्। त्यसपछि उनले प्रमुख प्रतिपक्षी नेकपासँग सत्ता सहकार्यका लागि प्रस्ताव गरेका छन्।
मुख्यमन्त्री शाहले आगामी आर्थिक वर्ष २०८३/८४ को बजेट पारित गर्न सहयोग गर्न र त्यसपछि सत्ता सहकार्य अघि बढाउने प्रस्ताव गरेका थिए। तर नेकपाले उक्त प्रस्ताव अस्वीकार गरेको थियो। यद्यपि दुवै पक्षबीच राजनीतिक संवाद भने निरन्तर जारी रहेको बताइएको छ।
यसअघि एमालेले आगामी आर्थिक वर्ष २०८३/८४ को प्रदेश बजेटप्रति असहमति जनाउँदै खर्च कटौतीको प्रस्ताव दर्ता गरेको थियो। यही विषयलाई लिएर कांग्रेस–एमालेबीचको सत्ता सहकार्यमा विवाद चुलिएको थियो, जसको परिणामस्वरूप गठबन्धन टुटेको हो।
एमालेले समर्थन फिर्ता लिएपछि अल्पमतमा परेका मुख्यमन्त्री शाहमाथि बिहीबार राति १२ बजाभित्र प्रदेशको बजेट पारित गराउने दबाब छ। यदि तोकिएको समयभित्र बजेट पारित हुन सकेन र सरकारले पेश्की बजेटसमेत ल्याउन नसके प्रदेश आर्थिक रूपमा बजेट शून्यताको अवस्थामा पुग्ने जोखिम रहेको छ।
