चितवन । राष्ट्रिय निकुञ्ज र राष्ट्रिय वन क्षेत्रमा गत एक वर्षमा २२ वटा गैँडाको मृत्यु भएको छ। गत आर्थिक वर्ष २०८२/८३ को असार मसान्तसम्म निकुञ्ज क्षेत्रमा २० वटा र राष्ट्रिय वन क्षेत्रमा दुई वटा गैँडा मरेका हुन्।
चितवन राष्ट्रिय निकुञ्जका सूचना अधिकारी अविनाश थापामगरका अनुसार दुई वटा गैँडाको मृत्यु करेन्ट लागेर भएको हो भने अन्य गैँडा प्राकृतिक कारणले मरेका हुन्। करेन्ट लागेर मरेका गैँडा चितवनको माडी र नवलपरासी (सुस्तापूर्व) को लोकाहा खोला नजिक फेला परेका थिए।
थापामगरका अनुसार माडीको मध्यवर्ती क्षेत्र र नवलपरासीको राष्ट्रिय वन क्षेत्रमा करेन्ट लागेर गैँडाको मृत्यु भएको हो। अन्य गैँडा दलदलमा फस्ने, आपसमा जुध्ने, बुढ्यौलीका कारण मर्ने तथा एउटा बच्चा गैँडालाई बाघले आक्रमण गरी मारेको जस्ता कारणले मरेका हुन्।
यसअघि आर्थिक वर्ष २०८१/८२ मा ३० वटा गैँडाको प्राकृतिक कारणले मृत्यु भएको थियो। तीमध्ये दुई वटा राष्ट्रिय वन क्षेत्रमा र बाँकी निकुञ्ज तथा मध्यवर्ती क्षेत्रमा मरेका थिए।
सन् २०२१ मा गरिएको राष्ट्रिय गणनाअनुसार चितवन राष्ट्रिय निकुञ्जमा ६९४ वटा वयस्क गैँडा रहेका छन्।
