नयाँदिल्ली। भारतको राजधानी नयाँदिल्लीस्थित प्रधानमन्त्री निवासअगाडि धर्नामा बसेका विपक्षी नेता राहुल गान्धी, समाजवादी पार्टीका अध्यक्ष अखिलेश यादव तथा कांग्रेसका शीर्ष नेताहरूलाई प्रहरीले हिरासतमा लिएको छ।
भारतीय सञ्चारमाध्यमहरूका अनुसार राहुल गान्धी, प्रियंका गान्धी, कांग्रेस अध्यक्ष मल्लिकार्जुन खरगे, अखिलेश यादवलगायतका नेताहरूलाई धर्नास्थलबाट बसमा राखेर अन्यत्र लगिएको हो।
धर्ना हटाउनुअघि केन्द्रीय मन्त्री जितेन्द्र सिंह र गृहसचिव गोविन्द मोहन धर्नास्थल पुगेर राहुल गान्धीसँग वार्तामा बसेका थिए। जितेन्द्र सिंहका अनुसार सरकारले संसदमा नीट परीक्षा र त्यससँग सम्बन्धित आन्दोलनबारे छलफल गर्न तयार रहेको जानकारी गराउँदा पनि राहुल गान्धी धर्ना अन्त्य गर्न सहमत भएनन्।
सिंहले राहुल गान्धीले सुरुमा संसदमा छलफलको माग राखे पनि पछि केन्द्रीय शिक्षामन्त्री धर्मेन्द्र प्रधानको राजीनामासमेत मागेको दाबी गरेका छन्। उनका अनुसार माग परिवर्तन गर्दै कांग्रेसले धर्ना जारी राख्ने अडान लिएको थियो।
मंगलबार दिउँसो करिब ३:३० बजे प्रधानमन्त्री निवासनजिक सुरु भएको कांग्रेसको धर्ना झन्डै तीन घण्टापछि प्रहरीले हटाएको हो। घटनास्थलमा १०० भन्दा बढी प्रहरी परिचालन गरिएको थियो। कांग्रेस कार्यकर्ताले नेताहरूलाई घेरेर प्रहरीलाई रोक्ने प्रयास गर्दा केहीबेर धकेलाधकेल भएको थियो। त्यसक्रममा प्रहरीले लाठीचार्जसमेत गरेको भारतीय सञ्चारमाध्यमहरूले जनाएका छन्।
प्रदर्शनका क्रममा कार्यकर्ताहरूले ‘प्रधानमन्त्री र गृहमन्त्रीले राजीनामा देऊ’ भन्दै नाराबाजी गरेका थिए। पञ्जाबका पूर्वमुख्यमन्त्री चरणजीत सिंह चन्नीसहित केही कार्यकर्तालाई पनि प्रहरीले हिरासतमा लिएको बताइएको छ।
यसअघि राहुल गान्धीले सामाजिक सञ्जाल एक्समार्फत विद्यार्थीमाथिको दमनलाई ‘हरेक भारतीय परिवारमाथिको आक्रमण’को संज्ञा दिँदै प्रधानमन्त्री नरेन्द्र मोदी अब यस विषयमा जवाफ नदिई उम्किन नसक्ने बताएका थिए। साथै, विद्यार्थीलाई न्याय दिलाउन प्रधानमन्त्री निवासअगाडि भइरहेको धर्नामा सहभागी हुन उनले सर्वसाधारणलाई आह्वानसमेत गरेका थिए।
