रोयटर्स । अमेरिकी रक्षा मन्त्री पिट हेगसेथले इरानविरुद्ध जारी युद्धमा अमेरिकाले हालसम्म ३७.५ अर्ब अमेरिकी डलर खर्च गरिसकेको बताएका छन्। युद्ध सञ्चालनका लागि थप बजेट आवश्यक रहेको भन्दै उनले पहिलो पटक अमेरिकी सांसदहरूसामु उपस्थित भएर अतिरिक्त बजेटको माग गरेका हुन्।
आगामी मध्यावधि निर्वाचन नजिकिँदै जाँदा राष्ट्रपति डोनाल्ड ट्रम्पको रिपब्लिकन पार्टीमाथि प्रतिनिधिसभा र सिनेटमा आफ्नो बहुमत कायम राख्ने दबाब बढेको छ। यहीबीच डेमोक्र्याटहरूले महँगो र अलोकप्रिय बन्दै गएको इरान युद्धलाई राजनीतिक मुद्दा बनाउँदै ट्रम्प प्रशासनको आलोचना तीव्र पारेका छन्।
सिनेट विनियोजन समितिकी वरिष्ठ डेमोक्र्याट सदस्य प्याटी मरेले ट्रम्प प्रशासनले युद्ध थप चर्काउने संकेत दिएको र अन्तर्राष्ट्रिय कानुनविपरीत नागरिक पूर्वाधारलाई समेत निशाना बनाउने धम्की दिएको आरोप लगाइन्। उनले यो युद्ध अर्को ‘अन्तहीन युद्ध’मा परिणत हुन सक्ने चेतावनी पनि दिइन्।
इरान युद्धका कारण अमेरिकी रक्षा मन्त्रालयको करिब १ ट्रिलियन डलर बराबरको बजेटमा ठूलो दबाब परेको बताइएको छ। संयुक्त चिफ्स अफ स्टाफका अध्यक्ष जनरल ड्यान केनले सैनिकहरूको सेवा–सुविधा व्यवस्थापन गर्न सकिए पनि सैन्य उपकरणको मर्मतसम्भार र भविष्यका रक्षा क्षमतामा लगानी गर्न चुनौती बढ्दै गएको बताए।
रक्षा मन्त्री हेगसेथले सांसदहरूलाई युद्धका लागि अतिरिक्त बजेट स्वीकृत गर्न आग्रह गर्दै आर्थिक वर्ष २०२७ का लागि प्रस्ताव गरिएको १.५ ट्रिलियन डलरको रक्षा बजेट पनि पारित गर्न अनुरोध गरेका छन्। पर्याप्त बजेट नदिनु नै अमेरिकाको राष्ट्रिय सुरक्षाका लागि सबैभन्दा ठूलो जोखिम हुने उनको भनाइ छ।
यसैबीच, यस महिनाको सुरुवातमा अमेरिका र इरानबीच भएको अस्थायी युद्धविराम भंग भएपछि दुवै देशले एकअर्कामाथि दैनिकजसो आक्रमण जारी राखेका छन्।
पेन्टागनका अनुसार, इरान युद्धमा हालसम्म १८ अमेरिकी सैनिकको मृत्यु भएको छ भने करिब ४३० सैनिक घाइते भएका छन्। जुलाई ७ यता मात्रै १०० सैनिक घाइते भए पनि उनीहरूमध्ये ९६ प्रतिशत पुनः सेवामा फर्किसकेको जनाइएको छ।
यता राष्ट्रपति ट्रम्पले पछिल्ला दिनहरूमा इरानका ऊर्जा केन्द्र, पुल, खार्ग द्वीपस्थित तेल टर्मिनल तथा ‘पिकएक्स माउन्टेन’ नामक भूमिगत आणविक केन्द्रलाई समेत निशाना बनाउने चेतावनी दिएका छन्।
