काठमाडौँ – आईसीसी क्रिकेट विश्वकप लिग–२ अन्तर्गत जारी त्रिकोणात्मक एकदिवसीय शृंखलामा पहिलो जितको लक्ष्यसहित नेपालले आज आयोजक नेदरल्यान्ड्ससँग प्रतिस्पर्धा गर्दैछ।
पहिलो खेलमा नामिबियासँग आठ विकेटले पराजित भएको नेपाल आजको खेलमा जित निकाल्दै अंकतालिकामा आफ्नो स्थिति बलियो बनाउने लक्ष्यमा छ। नेपाल र नेदरल्यान्ड्सबीचको खेल नेपाली समयअनुसार दिउँसो २:४५ बजे नेदरल्यान्ड्सको उट्रेख्तस्थित मैदानमा सुरु हुनेछ।
नामिबियाविरुद्धको हारपछि नेपालमाथि आजको खेल जित्ने दबाब बढेको छ। यस शृंखलाअन्तर्गत नेपालले जुलाई २७ मा पुनः नामिबियासँग र जुलाई २९ मा नेदरल्यान्ड्ससँग दोस्रो भेट गर्ने तालिका रहेको छ।
हालसम्म लिग–२ मा नेपालले २९ खेलबाट २४ अंक जोड्दै अंकतालिकाको पाँचौँ स्थानमा रहेको छ। समान २९ खेल खेलेको नामिबियाको पनि २४ अंक भए पनि कमजोर रनरेटका कारण टोली छैटौँ स्थानमा छ। २८ खेलबाट ३२ अंक जोडेको नेदरल्यान्ड्स तेस्रो स्थानमा रहेको छ।
अंकतालिकाको शीर्ष स्थानमा अमेरिका ४३ अंकसहित अग्रस्थानमा छ भने स्कटल्यान्ड ३८ अंकसहित दोस्रो स्थानमा रहेको छ। ३१ अंकसहित ओमान चौथो स्थानमा छ। ओमानलाई उछिनेर शीर्ष चारमा पुग्न नेपालले बाँकी खेलमध्ये कम्तीमा चार खेल जित्नुपर्ने अवस्था छ। क्यानडा २४ अंकसहित सातौँ स्थानमा रहेको छ भने १४ अंक जोडेको यूएई तालिकाको पुछारमा छ।
