काठमाडौँ। पाकिस्तानको इस्लामावादमा जारी सेन्ट्रल एसियन भलिबल एसोसिएसन (काभा) पुरुष च्याम्पियनसिपमा नेपालले आज बंगलादेशसँग प्रतिस्पर्धा गर्दैछ।
इस्लामावादस्थित लियाकत जिम्नेसियममा हुने खेल नेपाली समयअनुसार दिउँसो १ बजे सुरु हुनेछ। यो प्रतियोगितामा नेपालको चौथो खेल हो।
नेपाल यसअघिका तीनै खेलमा पराजित हुँदै अंकविहीन रहेको छ। काजकिस्तान, श्रीलङ्का र आयोजक पाकिस्तानसँग हार बेहोरेको नेपाल आज पहिलो जित निकाल्ने लक्ष्यका साथ मैदान उत्रिनेछ। सेमिफाइनल पुग्ने सम्भावना जीवित राख्न पनि नेपालका लागि यो खेल जित्नैपर्ने अवस्थाको छ।
नेपालले लिग चरणको अन्तिम खेल सोमबार उज्बेकिस्तानसँग खेल्ने तालिका छ।
प्रतियोगितामा नेपालसहित आयोजक पाकिस्तान, काजकिस्तान, श्रीलङ्का, बंगलादेश र उज्बेकिस्तान गरी ६ टोली सहभागी छन्। लिग चरणमा सबै टोलीले एकअर्कासँग खेल्नेछन् भने शीर्ष चार टोलीले सेमिफाइनलमा स्थान बनाउनेछन्।
