जननायक तथा नेपाली लोकतान्त्रिक आन्दोलनका प्रणेता स्वर्गीय विश्वेश्वरप्रसाद (बी.पी.) कोइरालाको ४४औँ स्मृति दिवस अमेरिकामा पनि मनाइएको छ।
नेपाली जनसम्पर्क समिति अमेरिका, न्यूयोर्क च्याप्टरद्वारा २०२६ जुलाई २६ का दिन स्मृति दिवस मनाइएको हो ।
कार्यक्रममा नेपाली जनसम्पर्क समिति अमेरिका, न्यूयोर्क च्याप्टरका सभापति दिनेश भण्डारीले बी.पी. कोइरालाले स्थापित गर्नुभएको राष्ट्रिय एकता, मेलमिलाप, लोकतन्त्र, समाजवाद तथा नागरिक स्वतन्त्रताका आदर्श र मार्गदर्शन आज पनि उत्तिकै सान्दर्भिक रहेको उल्लेख गर्दै ती मूल्य–मान्यतालाई आत्मसात् गर्दै अघि बढ्नु नै उहाँप्रति सच्चा सम्मान हुने धारणा व्यक्त गर्नुभयो।
उहाँले लामो समयपछि आयोजना हुन गइरहेको नेपाली जनसम्पर्क समिति अमेरिकाको केन्द्रीय तेस्रो ऐतिहासिक महाधिवेशन आगामी अगस्ट १४ देखि १६, २०२६ सम्म वाशिंगटन डी.सी. मेट्रो क्षेत्रमा सम्पन्न हुने जानकारी गराउँदै उक्त महाधिवेशनलाई ऐतिहासिक रूपमा सफल बनाउन सबैमा सक्रिय सहभागिताको आह्वान गर्नुभयो।
यसैगरी, महाधिवेशनको पूर्वसन्ध्यामा नेपाली जनसम्पर्क समिति अमेरिका, न्यूयोर्क च्याप्टरको आयोजनामा अगस्ट २, २०२६ मा हुने Summer BBQ तथा बृहत् भेला कार्यक्रममा न्यूयोर्क तथा अमेरिकाभर रहेका सम्पूर्ण नेपाली दाजुभाइ, दिदीबहिनी, शुभेच्छुक तथा विभिन्न नेपाली संघ–संस्थाका प्रतिनिधिहरूलाई गरिमामय उपस्थितिका लागि हार्दिक निमन्त्रणा तथा आह्वान गर्नुभयो।
कार्यक्रमका क्रममा च्याप्टरका सम्पूर्ण कार्यसमिति सदस्यहरूको उपस्थितिमा स्वर्गीय बी.पी. कोइरालाको तस्बिरमा पुष्पगुच्छा अर्पण गर्दै भावपूर्ण श्रद्धाञ्जली व्यक्त गरिएको थियो। कार्यक्रम नेपाली जनसम्पर्क समिति अमेरिका, न्यूयोर्क च्याप्टरका महासचिवद्वारा सञ्चालन गरिएको थियो।
उक्त कार्यक्रम न्यूयोर्कमा सभ्य, गरिमामय र श्रद्धापूर्ण वातावरणमा सम्पन्न भएको थियो।
