काठमाडौं । राष्ट्रिय स्वतन्त्र पार्टी (रास्वपा) ले सुनसरीसहित पूर्वी नेपालका विभिन्न जिल्लामा हालै भएका हिंसात्मक घटनाप्रति गम्भीर चासो व्यक्त गर्दै शान्ति, सामाजिक सद्भाव र राष्ट्रिय एकता कायम राख्न सबै पक्षलाई संयमित हुन आग्रह गरेको छ।
पार्टी सभापति रवि लामिछानेले मंगलबार जारी गरेको विज्ञप्तिमा कुनै पनि विवाद वा समस्याको समाधान हिंसाबाट सम्भव नहुने उल्लेख गर्दै अफवाह र उत्तेजनाबाट टाढा रहन आमनागरिक, धार्मिक तथा सामाजिक अगुवा तथा सबै सरोकारवालालाई अपिल गरेका छन्।
विज्ञप्तिमा संवेदनशील परिस्थितिमा शान्ति–सुरक्षा कायम गर्न, नागरिकको जिउधनको रक्षा गर्न तथा अवस्था सामान्य बनाउन सरकार र स्थानीय प्रशासनसँग पार्टी निरन्तर समन्वयमा रहेको जनाइएको छ।
रास्वपाले घटनाको जरोसम्म पुग्ने गरी स्वतन्त्र, निष्पक्ष र शीघ्र छानबिन गर्न तथा दोषीलाई कडा कानुनी कारबाहीको दायरामा ल्याउन सरकारसँग माग गरेको छ। साथै, पीडितलाई उचित न्याय, क्षतिपूर्ति र निःशुल्क उपचारको व्यवस्था गर्न पनि आग्रह गरिएको छ।
पार्टीले आफू शान्ति, न्याय र सामाजिक सद्भावको पक्षमा सधैं प्रतिबद्ध रहेको उल्लेख गर्दै संवाद र सहमतिमार्फत समस्याको शान्तिपूर्ण समाधान खोज्न आवश्यक सबै सकारात्मक भूमिका निर्वाह गर्न तयार रहेको जनाएको छ।
साथै, यस्ता संवेदनशील घटनालाई कुनै पनि बहानामा राजनीतिकरण नगर्न सबै राजनीतिक दल तथा सम्बन्धित पक्षसँग आग्रह गर्दै रास्वपाले आफ्ना स्थानीय समिति, सदस्य तथा शुभेच्छुकलाई पनि शान्ति र सद्भाव कायम राख्न सक्रिय र जिम्मेवार भूमिका खेल्न निर्देशन दिएको छ।
