चितवन ।राप्ती नगरपालिकाका ५०७ परिवारलाई धुवाँरहित चुलो वितरण गरिएको छ ।
स्थानीय सरकारसँग सहकार्य गरी सपना भिलेज सोसियल इम्प्याक्टले सो सङ्ख्यामा धुवाँरहित चुलो वितरण गरेको इम्प्याक्टका अध्यक्ष ध्रुव गिरीले जानकारी दिए ।
नगरपालिकासँगको सहकार्यमा ४०५ वटा र समुदायसँगको सहकार्यमा १०२ वटा चुलो वितरण गरिएको गिरीले बताए ।
विगत दुई वर्षदेखि सपना भिलेजले धुवाँरहित चुलो वितरण गर्दै स्वच्छ खाना पकाउने अभ्यासलाई प्रोत्साहन, दाउराको प्रयोगमा कमी तथा कार्बन उत्सर्जन घटाउने अभियान सञ्चालन गर्दै आएको छ ।
धुवाँरहित चुलोले स्वस्थ परिवार, हराभरा वन, स्वच्छ वातावरण र दिगो भविष्य निर्माणमा योगदान गर्ने अध्यक्ष गिरीले बताए । सपना भिलेजले यसअघि इच्छाकामना गाउँपालिका, कालिका, रत्ननगर र खैरहनी नगरपालिकामा चुलो वितरण गरिसकेको छ ।
