काठमाडौं– युवा, श्रम तथा रोजगार मन्त्रालयले वैदेशिक रोजगारीका लागि नेपाली कामदार विदेश पठाउने प्रक्रियालाई थप व्यवस्थित बनाउन माग प्रमाणीकरणसम्बन्धी नयाँ व्यवस्था लागू गरेको छ।
साउन १३ गते मन्त्रीस्तरीय निर्णयमार्फत मन्त्रालयले अबदेखि वैदेशिक रोजगारीका लागि माग प्रमाणीकरण गर्दा कामदारले गर्नुपर्ने कामको विस्तृत विवरण (जब डिस्क्रिप्सन) अनिवार्य रूपमा उल्लेख गर्नुपर्ने व्यवस्था गरेको हो।
नयाँ व्यवस्थाअनुसार रोजगारदाताले काम कम्पनीभित्र (इनडोर) वा कम्पनीबाहिर (आउटडोर) कुन प्रकारको हो भन्ने स्पष्ट खुलाउनुपर्नेछ। यदि काम दुवै प्रकृतिको भए त्यसको कार्यसमयसमेत उल्लेख गरी माग प्रमाणीकरण गरिनुपर्नेछ।
यसअघि कामको शीर्षक मात्रै उल्लेख गरेर माग प्रमाणीकरण हुने व्यवस्था रहेकामा अब भने विस्तृत कार्य विवरण अनिवार्य गरिएको मन्त्रालयले जनाएको छ।
मन्त्रालयका अनुसार गन्तव्य मुलुकका रोजगारदाताले प्रस्ताव गरेका सेवा–सर्त, पारिश्रमिक, सुविधा, कार्य वातावरण तथा सम्झौताका अन्य पक्षहरूको वैदेशिक रोजगार सम्बन्धी मागपत्र जाँचबुझ निर्देशिका, २०७५ बमोजिम परीक्षण गरी प्रमाणीकरण गरिँदै आएको छ।
नयाँ व्यवस्थाले वैदेशिक रोजगारीमा जाने नेपाली श्रमिकमाथि हुन सक्ने शोषण र ठगीका घटना न्यूनीकरण गर्न, श्रमिकको सेवा–सर्तको सुरक्षा सुनिश्चित गर्न तथा विदेश पठाउने प्रक्रियालाई थप पारदर्शी, न्यायोचित र प्रभावकारी बनाउन सहयोग पुग्ने मन्त्रालयको विश्वास छ।
