सिंहदरबारस्थित प्रधानमन्त्री तथा मन्त्रिपरिषद्को कार्यालयमा जारी छलफलमा सुनसरीसहित मधेशका केही जिल्लामा पछिल्ला दिनमा उत्पन्न तनाव, सामाजिक सद्भाव कायम गर्ने उपाय तथा शान्ति–सुरक्षा अवस्थाबारे विचार–विमर्श भइरहेको छ।
प्रधानमन्त्रीको सचिवालयका अनुसार छलफलमा जनता समाजवादी पार्टीका महन्थ ठाकुर, जनमत पार्टीका अध्यक्ष सी.के. राउत, राष्ट्रिय मुक्ति पार्टी नेपालका अध्यक्ष राजेन्द्र महतो, आम जनता पार्टीका अध्यक्ष प्रभु शाह, लालबाबु राउत, समिम मियाँ अन्सारी, राम के. शर्मा, शरतसिंह भण्डारी, जयकान्त राउतलगायतका मधेश केन्द्रित दलका नेताहरू सहभागी छन्। राष्ट्रिय स्वतन्त्र पार्टी (रास्वपा)का सांसद अमरेशकुमार सिंह पनि छलफलमा उपस्थित छन्।
यसअघि बिहीबार मधेशवादी दलका नेताहरूले रास्वपा सभापति रवि लामिछानेसँग पनि भेटवार्ता गरेका थिए। त्यस भेटमा पनि मधेशका विभिन्न जिल्लामा देखिएको तनाव, सामाजिक सद्भाव र शान्ति कायम गर्ने विषयमा छलफल भएको थियो।
