काठमाडौँ । सम्पत्ति शुद्धीकरणसम्बन्धी मुद्दामा मिलन गुरुङ ‘चक्रे मिलन’ले सर्वोच्च अदालतबाट सफाइ पाएका छन्। सर्वोच्च अदालतले विशेष अदालतको सफाइको फैसला सदर गरेसँगै उनीविरुद्धको उक्त मुद्दा टुंगिएको हो।
न्यायाधीशद्वय अब्दुल अजिज मुसलमान र मेघराज पोखरेलको संयुक्त इजलासले बिहीबार विशेष अदालतको निर्णयलाई सदर गरेको हो। यसअघि विशेष अदालतको फैसलाविरुद्ध नेपाल सरकारले २०७५ जेठ ३० गते सर्वोच्च अदालतमा पुनरावेदन दर्ता गरेको थियो।
सम्पत्ति शुद्धीकरण अनुसन्धान विभागले केन्द्रीय अनुसन्धान ब्युरो (सीआईबी) को अनुसन्धानका आधारमा २०७० जेठमा चक्रे मिलनसहित पाँच जनाविरुद्ध विशेष अदालतमा मुद्दा दायर गरेको थियो। उनीहरूमाथि अवैध गतिविधिबाट सम्पत्ति आर्जन गरेको, धम्की दिएर रकम असुलेको तथा त्यस्तो रकमलाई वैध देखाउन विभिन्न क्षेत्रमा लगानी गरेको आरोप लगाइएको थियो।
अभियोगपत्रमा चक्रे मिलनले करिब ८ करोड रुपैयाँ बराबरको अवैध सम्पत्ति आर्जन गरेको दाबी गरिएको थियो। विभागका अनुसार काठमाडौँमा ७ आना जग्गा तथा परिवारका सदस्यको नाममा काठमाडौँ र गोरखामा करिब ३० रोपनी जग्गासहित झन्डै ७ करोड रुपैयाँ बराबरको सम्पत्ति फेला परेको दाबी गरिएको थियो।
यसै मुद्दामा प्रतिवादी रहेका राजीव गुरुङ ‘दीपक मनाङे’ले भने २०७४ माघ १० गते नै विशेष अदालतबाट सफाइ पाइसकेका थिए।
यता, यही मुद्दाका अन्य प्रतिवादी गणेश लामा, पर्शुराम बस्नेत र अभिषेक गिरीविरुद्धको मुद्दा भने अझै सर्वोच्च अदालतमा विचाराधीन रहेको छ।
