नेपाली कांग्रेस संस्थापन इतरले आगामी २९ देखि गते आयोजना गरेको राष्ट्रिय भेला स्थगित नभएको स्पष्ट पारेको छ ।
आयोजक समितिका संयोजक डा. शशांक कोइरालाको नाममा कार्यक्रम स्थगित भएको भन्दै भ्रामक सूचना सामाजिक सञ्जालमा भाइरल भएपछि आयोजकका तर्फबाट भेला तोकिएकै समयमा हुने स्पष्ट पारेको हो ।
राष्ट्रिय भेला मूल आयोजक समितिका प्रचार विभाग प्रमुख मीन विश्वकर्माले साउन २९ देखि ३१ गते काठमाडौंमा भेला हुने कुरा सुनिश्चित भइसकेको भन्दै कुनै पनि भ्रममा नपर्न आग्रह गरेका छन्। व्रिश्वकर्माका अनुसार कांग्रेसभित्रको विकसीत पछिल्लो राजनीतिबाट हतास भएका समूहहरुको अगुवाईमा भ्रम फैल्याईएको हो ।
उनले भनेका छन्, ‘प्रा.डा. शशांक कोइरालाको नेतृत्व, शीर्ष नेताहरूको समर्थन, सभापति शेरबहादुर देउवाको स्वदेश आगमन र भेलालाई सम्बोधन गर्नुहुने तथा अदालतबाट मुद्दाको पुनरावलोकन गर्ने आदेश (अनुमति) समेत आइसकेपछि डराएको हतास मनस्थितिको उपजको रूपमा कार्यक्रमबारे जथाभाबी लेखेका हुन्।’
संयोजकको किर्ते हस्ताक्षर समेत गरी तथाकथित विज्ञप्ति जारी गरिएको भन्दै आपत्ति जनाए। उनले भेलाको तयारी तीव्र भइरहेकाले कुनै हालतमा पनि नरोकिने बताए ।
भेलाको तयारीस्वरुप आवश्यक व्यवस्थापकियसहित प्रचारका कामहरु भईरहेका छन् । संयोजक कोईरालाले सबै क्षेत्रीय सभापतिसहित विभिन्न तहमा रहेका नेता कार्यकर्ताहरुलाई भेलामा सहभागिताका लागि निमन्त्रणा पनि गरेका छन् ।
भेलालाई पार्टीका निवर्तमान सभापति शेरबहादुर देउवा, नेता शेखर कोईराला, संयोजक डा. शशांक कोईराला, कृष्ण सिटौला, प्रकाशमान सिंह, बिमलेन्द्र निधी लगायतका शीर्ष नेताहरुले सम्बोधन गर्नेछन् ।
