नेपाली कांग्रेसको संस्थापन इतर समुहको राष्ट्रिय सम्मेलन आज सकिँदैछ । शुक्रवार राष्ट्रिय भेलाको नाममा शुरु भई हिजो सम्मेलनमा परिणत गरिएको कार्यक्रम आज सकिन लागेको हो । सम्मेलनमा विभिन्न नेताहरुले प्रस्तुत गरेको प्रस्तावमाथि छलफल गरेर निष्कर्ष निकालिने आयोजकले जनाएको छ ।
नेता रमेश लेखकले प्रस्तुत गरेको विधान संशोधनको प्रस्ताव, विमलेन्द्र निधिको राजनीतिक प्रस्ताव, एनपी साउदको समसामयिक प्रस्ताव र प्रकाशशरण महतको आर्थि{क प्रस्तावमाथि हिजो दिनभर समूहगत रुपमा छलफल गरिएको थियो । लेखकको ४३ बुँदे अवधारणा पत्रमा पार्टीको सबै तहका निर्वाचित सभापति र पदाधिकारीहरूको अविश्वास प्रस्ताव सम्बन्धमा समय सापेक्ष परिमार्जन गर्ने उल्लेख छ ।
त्यस्तै विशेष महाधिवेशनको आयोजना हुने अवस्था र समयका बरेमा पनि स्पष्ट उल्लेख गरिएको छ । केन्द्रीय कार्यालय, केन्द्रीय कार्यसमितिबारे पनि स्पष्टताको आवश्यकता भन्दै विधान संसोधनको प्रस्तावमा थप व्याख्या गरिएको छ । गतवर्षको पुषमा आयोजना भएको विधान महाधिवेशनको वैद्यताबारे प्रश्न उठाएको यो समूहले कार्यसमिति र केन्द्रीय कार्यालयबारे स्पष्टता चाहेको बुझिएको छ ।
यसैगरि सम्मेलनमा राजनीतिक प्रतिवेदन पेश गर्दै नेता निधिले शेरबहादुर देउवाकै अध्यक्षतामा १५औँ महाधिवेशन आयोजना गरिने घोषणा गरे । ‘मुलुकको समसामियक विषयको प्रस्ताव’ पेश गर्दै पूर्वपरराष्ट्रमन्त्रीसमेत रहनुभएका नेता एनपी साउदले पार्टीले जनतासमक्ष गल्ती स्वीकार गर्नुपर्ने धारणा राखे । आत्मसमीक्षा कमजोरी नभई सुधारको पहिलो आधार भएको उल्लेख गर्दै साउदले गल्तीबाट पाठ सिक्ने प्रतिबद्धता नागरिकसामु गर्नुपर्ने सुझाव प्रस्तुत गरेका छन् ।
पूर्व अर्थमन्त्रीसमेत रहेका नेता डा. प्रकाशशरण महतले ‘नेपाली कांग्रेसको आर्थिक–सामाजिक नीतिको कार्यदिशा’ प्रस्ताव प्रस्तुत गरे । दश बुँदामा प्रतिवेदन प्रस्तुत गरेका महतले कांग्रेसले आगामी दिनमा आर्थिक–सामाजिक विकासका लागि लिने बाटो उल्लेख गरेका छन् ।
