काठमाडौं । रास्वपाका सांसद राजीव खत्रीले सरकारले झापा, बर्दिया, चितवन र भक्तपुरमा दशकौँदेखि अल्झिएको भूमिहीनको समस्या समाधानतर्फ काम गरिरहेको बताएका छन्।

प्रतिनिधि सभाको बैठकमा बोल्दै आफ्नै उपस्थितिमा भक्तपुरमा भक्तपुरमा ४२१ जनालाई जग्गा धनी दर्ता प्रमाण पुर्जा वितरण गरेको बताए।

उनले भने, ‘तर त्यही दिन नजिकैको बोडेस्थित सुकुम्वासी होल्डिङ सेन्टरमा एउटा अत्यन्त दुःखद समाचार आयो, ५७ वर्षीय हिरालाल पासवान मृत भेटिनुभयो। थापाथलीको सुकुम्वासी बस्ती भत्काएपछि उहाँ होल्डिङ सेन्टरमा बस्दै आउनुभएको रहेछ। एउटा हातमा लालपुर्जा थियो, अर्को हातमा नागरिकको मृत्युको खबर।’

उनले सरकार भूमिहीनका लागि काम गरिरहेको भएपनि ती कामको आशा प्रत्येक भूमिहीनसम्म किन पुग्न सकेन? भन्दै प्रश्न गरे।

उनले भने, ‘३५ वर्षपछि सरकारले भनिरहेको छ भूमिहीन, तिमीहरू एक्लो छैनौ, हामी छौँ। भूमिमन्त्रीले आफ्नो कार्यकालमा सुकुम्वासी र सुकुम्वासी शब्दलाई शब्दकोशमा मात्र सीमित गर्ने सङ्कल्पका साथ काम गरिरहनुभएको छ। यसलाई राजनीतिक पूर्वाग्रहले ढाक्नु हुँदैन। आलोचना गरौँ, कमजोरी देखाऔँ, सरकारलाई खबरदारी गरौँ तर केही पनि भएको छैन भन्ने झुट्टा भाष्य निर्माण गरेर निराशाको आगो नझोसौँ।’

उनले निराशाले राजनीति नभई कहिलेकाहीँ कसैको जीवनसँग खेलबाड गर्ने बताए।

उनले थपे, ‘भइरहेका राम्रो कामको प्रचार गरौँ, आशा जगाऔँ, भूमिहीनलाई अधिकारको बाटो देखाऔँ। हामीलाई निराशा होइन, भरोसा चाहिएको छ। मर्न प्रेरित गर्ने भाष्य होइन, बाँच्न प्रेरित गर्ने राजनीति चाहिएको छ। हामी भूमिहीनलाई अधिकार दिऔँ, निराशा होइन। प्रश्न गरौँ, तर आशा पनि जगाऔँ। राजनीति गरौँ, तर कसैलाई मृत्यु रोज्ने अवस्थामा नपुर्‍याऔँ।’