पूर्वमन्त्री एवं नेपाली कांग्रेसका नेता दिपक खड्काले विशेष महाधिवेशनबाट सभापति बनेका गगन थापाले गत फागुनमा सम्पन्न निर्वाचनपछि दिएको भनिएको राजिनामा किन फिर्ता भयो भनि प्रश्न गरेका छन् । सामाजिक सञ्जाल फेसबुकमा स्टाटस लेख्दै नेता खड्काले थापाको राजिनामा फिर्ता के का लागि भयो भन्दै ठोस् कारण सार्वजनिक गर्न माग गरेका हुन् ।
अघिल्लो प्रतिनिधिसभामा ८९ सिटसहित पहिलो दल रहेको नेपाली कांग्रेसले १६५ प्रत्यक्ष सिटमध्ये १८ सिटमा सिमित रहन पुगेको स्मरण गराउँदै खड्काले संगठन र जनमतबीचको दूरी र परिस्थिति बुझ्न नसक्दा इतिहासले अर्को अध्याय लेखेको उल्लेख गरेका छन् । उनले लेखेका छन्–“निर्वाचन परिणामको जिम्मेवारी लिँदै सभापतिले राजीनामा दिएको भनियो तर पछि राजीनामा फिर्ता किन ? के का लागि भयो ! ठोस कारण सार्वजनिक भएन ।”
अहिले लोकतन्त्र संकटमा परेको जिकिर गर्दै नेता खड्काले सामाजिक सञ्जालमा अनेकौँ पेज सञ्चालन गर्दैमा, केही बायस्ड सञ्चारमाध्यममा आफ्नो समर्थनमा लेखाउदैमा र समर्थन जुटाउँदैमा वा आफूभन्दा फरक विचार राख्नेहरूमाथि निरन्तर प्रहार गर्दैमा पार्टी बलियो नबन्ने पनि दाबी गरेका छन् । कुशल नेतृत्वको वास्तविक परीक्षा भनेको फरक विचार राख्नेहरूलाई पनि साथमा लिएर हिँड्न सक्नु, संगठनलाई एकताबद्ध राख्नु, कार्यकर्ताको मन जित्नु र जनताको विश्वास कायम राख्नु भएको पनि उनले लेखेका छन् ।
सबै पक्षलाई समेटेर पार्टीलाई बलियो बनाउने कुरामा १३ औं र १४ औं महाधिवेशनबाट निर्वाचित सभापति शेरबहादुर देउवाबाट सिक्न सकिने भन्दै उनले बारम्बार महाधिवेशनको चर्चा र मिति तोक्नु मात्र पर्याप्त नहुने पनि टीप्पणी गरेका छन् । महाधिवेशनको वास्तविक अर्थ संगठनभित्रको लोकतन्त्र, सहमति, सहभागिता र सबैको सम्मान सुनिश्चित गर्नु भएको खड्काको टीप्पणी छ । आफ्नो वरिपरि प्रशंसा गर्ने केही मानिस, सामाजिक सञ्जालका समर्थक र सीमित सञ्चारमाध्यमको सकारात्मक प्रचारले क्षणिक रूपमा राम्रो देखिन सकिएला, तर इतिहास र अन्ततः जनमतले नेतृत्वको वास्तविक मूल्यांकन गर्ने उनको विश्वास छ ।
सभापति थापातर्फ संकेत गर्दै उनले लेखेका छन्– “दुईमध्ये एउटा बाटो रोज्नुपर्छ र भन्नुपर्छ – पहिलो– ‘म सबैलाई मिलाउन सक्दिनँ’ भनेर आफ्नो सीमितता स्वीकार गर्ने, वा दोस्रो– ‘सबै पक्षलाई समेटेर नेपाली कांग्रेसलाई बलियो, एकताबद्ध र जनविश्वासयोग्य पार्टी बनाउने।’ किनकि कुर्सी प्राप्त गर्नु मात्र नेतृत्व होइन । त्यो कुर्सीमा बसेर इतिहासको जिम्मेवारी पूरा गर्नु नै वास्तविक नेतृत्व हो।”
इतिहासमा लेखिएको सत्य कुरा नमेटिँने भन्दै खड्काले आज लेखिँदै गरेको कांग्रेसको इतिहास भोलिको पुस्ताले पढ्ने पनि स्मरण गराएका छन् । खड्काले थपेका छन्– ‘सहमति, सहकार्य र एकता आजको आवश्यकता हो ।’
