काठमाडौँ । परराष्ट्र मन्त्रालयले भोटेकोशी बाढीपछि ३४ देशका ५९० विदेशी नागरिक अझै बेपत्ता रहेको जनाएको छ ।
बिहीबार मन्त्रालयमा आयोजित नियमित पत्रकार सम्मेलनमा प्रवक्ता लोकबहादुर पौडेल क्षेत्रीले हालसम्म ३०० भन्दा बढी विदेशी नागरिकको उद्धार गरिएको जानकारी दिए । उनका अनुसार ३४ देशका ५९० विदेशी नागरिक भने अझै बेपत्ता सूचीमा छन् ।
रसुवाको टिमुरेदेखि नुवाकोट, धादिङ, चितवन तथा नवलपरासीका पूर्व र पश्चिम क्षेत्रसम्म ९ हजार ३०० भन्दा बढी नेपाली सेना खोज तथा उद्धार कार्यमा परिचालित रहेको प्रवक्ता पौडेलले बताए ।
उनका अनुसार भारतीय टनेल उद्धार टोली नेपाली सेनासँग समन्वय गरी आवश्यक उपकरणसहित खोज तथा उद्धारमा खटिएको छ । चिलिमेतर्फ थप एक्स्काभेटर पठाउने तयारी भइरहेको पनि उनले जानकारी दिए ।
लाङटाङ क्षेत्रमा नेपाली सेना र प्राविधिक टोलीले मेसिनको प्रयोग गरी सुरुङको अपस्ट्रिम भागमा सानो प्वाल खोल्न सफल भएको मन्त्रालयले जनाएको छ । त्यस्तै, माथिल्लो त्रिशूली–३ ‘ए’ आयोजनामा चिनियाँ टनेल टोली र नेपाली सेनासहित ९३ सदस्यीय संयुक्त टोली थप जनशक्ति तथा उपकरणसहित परिचालन गरिएको छ ।
बाढीमा ज्यान गुमाएकाहरूको पहिचानका लागि भारतबाट १९ सदस्यीय र चीनबाट पाँच सदस्यीय विशेष फोरेन्सिक टोली कार्यक्षेत्रमा खटिएको प्रवक्ता पौडेलले बताए ।
विपद्पछि भारत, चीन, अमेरिका, बेलायत, जापान, दक्षिण कोरिया, अस्ट्रेलिया, युरोपेली युनियन, विश्व बैंक र एसियाली विकास बैंक (एडीबी) लगायतका मित्रराष्ट्र तथा दातृ निकायले ऐक्यबद्धता जनाउँदै सहयोग गरिरहेको मन्त्रालयले जनाएको छ ।
प्रवक्ता पौडेलका अनुसार केरुङबाट १४० नेपाली तातोपानी नाका हुँदै नेपाल फर्कने क्रममा छन् । चिनियाँ सीमा क्षेत्रमा अझै करिब १०० नेपाली बेपत्ता रहेको पनि उनले जानकारी दिए ।
