काठमाडौं । अमेरिकी विदेशमन्त्री मार्को रुबियोले राष्ट्रिय स्वतन्त्र पार्टी (रास्वपा) का सभापति रवि लामिछानेलाई टेलिफोन गरी भोटेकोसी बाढीमा परी ज्यान गुमाएकाहरूप्रति गहिरो समवेदना व्यक्त गरेका छन्।
टेलिफोन संवादमा रुबियोले बाढीबाट प्रभावित नेपाली नागरिक तथा नेपाल सरकारप्रति अमेरिकी सरकारको ऐक्यबद्धता जनाउँदै विपद्को कठिन घडीमा अमेरिका नेपालसँगै रहेको बताएका थिए।
लामिछानेले बाढीपछि जारी खोजी, उद्धार तथा राहत कार्यमा नेपाल सरकारले उपलब्ध सम्पूर्ण स्रोतसाधन परिचालन गरिरहेको जानकारी गराएका थिए। उनले नेपालमा रहेका विदेशी नागरिकको सुरक्षा र संरक्षणमा समेत सरकार उत्तिकै प्रतिबद्ध रहेको बताएका थिए।
संवादका क्रममा लामिछानेले विपद्को समयमा अमेरिकी सरकारबाट प्राप्त सहयोगप्रति धन्यवाद व्यक्त गरेका थिए।
जवाफमा विदेशमन्त्री रुबियोले नेपाललाई थप सहयोग आवश्यक परे अमेरिकी सरकार सहयोग गर्न तयार रहेको प्रतिबद्धता जनाएका थिए।
भोटेकोसी क्षेत्रमा आएको बाढीबाट ठूलो जनधनको क्षति भएपछि सरकारले खोजी, उद्धार, राहत तथा प्रभावितको व्यवस्थापनलाई तीव्रता दिएको छ।
