काठमाडौँ । मलेसियामा जारी एसीसी पुरुष प्रिमियर कप क्रिकेट प्रतियोगिताको सेमिफाइनलमा नेपालले बिहीबार ओमानसँग प्रतिस्पर्धा गर्दैछ।
नेपाली समयअनुसार बिहान ७:१५ बजे सुरु हुने खेलमा दुवै टोली फाइनलमा स्थान सुरक्षित गर्ने लक्ष्यसहित मैदानमा उत्रनेछन्। नेपाल समूह ‘ए’ को विजेता तथा ओमान समूह ‘बी’ को उपविजेता बन्दै सेमिफाइनलमा पुगेका हुन्।
समूह चरणका चारमध्ये तीन खेलमा जित हात पार्दै नेपाल समूह ‘ए’ को शीर्ष स्थानमा रह्यो। नेपालले पहिलो खेलमा बहराइनलाई ७ विकेटले, दोस्रो खेलमा मलेसियालाई ६ विकेटले र तेस्रो खेलमा साउदी अरेबियालाई ५ विकेटले पराजित गरेको थियो। यद्यपि, समूह चरणको अन्तिम खेलमा नेपाल हङकङसँग १५ रनले पराजित भएको थियो।
समूह चरणमा नेपाली ब्याटिङ लाइनअप अपेक्षाअनुसार बलियो देखिन सकेन। केही खेलमा ब्याट्सम्यानहरूले संघर्ष गरे पनि नेपालले तीन खेलमा जित निकाल्दै सेमिफाइनलको यात्रा तय गरेको हो।
अब फाइनल प्रवेशका लागि ओमानविरुद्धको खेलमा नेपालको ब्याटिङ प्रदर्शन महत्वपूर्ण हुनेछ। बलिङमा भने नेपालले समूह चरणमा तुलनात्मक रूपमा प्रभावशाली प्रदर्शन गरेको थियो।
