बलिउडका अब्बल अभिनेता धर्मेन्द्र देवलको निधन भएको छ । श्वासप्रश्वासमा समस्या आएपछि मुम्बईको ब्रीच क्यान्डी अस्पतालमा उपचाररत ८९ वर्षिय धर्मेन्द्रको आज निधन भएको हो । स्वास्थ्य अवस्था स्थिर नभएपछि भेन्टिलेटरमा राखिएको थियो । उनलाई भेट्न शाहरुख खान, सलमान खान लगायत बलिउडका धेरै हस्तीहरू पनि सोमबार अबेर राति क्यान्डी अस्पताल पुगेका थिए ।
धर्मेन्द्र हिन्दी सिनेमाका सबैभन्दा सम्मानित र लोकप्रिय ताराहरू मध्ये एक मानिन्छन् । ७ दशक लामो करियरमा उनले ३०० भन्दा बढी चलचित्रमा काम गरेका छन् । जसमध्ये शोले’, ’चुपके चुपके’, ’सीता और गीता’, ’धरम वीर’ जस्ता धेरै सुपरहिट फिल्महरू हुन् ।
उनले फिल्ममा बोलेका संवादहरू समेत आजसम्म पनि हिट छन् । जसमा शोलेको ’बसन्ती इन कुत्ते के आगे डोन्ट डान्स’ सबैभन्दा हिट भएको थियो । धर्मेन्द्र ८९ वर्षका भए पनि उद्योगमा सक्रिय थिए । धर्मेन्द्र हालै फिल्म ’रकी और रानी की प्रेम कहानी’ पछि ’तेरी बातों…मे ऐसा उल्झा जिया’ मा देखिएका थिए, जसमा उनले आफ्नो अभिनयले दर्शकको मन जितेका थिए ।
उनी अगस्त्य नन्दको फिल्म इक्किसमा पनि देखिनेछन् । जुन उनको अन्तिम फिल्म बन्नेछ । यो फिल्म २५ डिसेम्बरमा रिलिज हुँदैछ । धर्मेन्द्रको परिवारमा पत्नी हेमा मालिनी र सन्तानहरू अभिनेता सन्नी देओल, बबी देओल, ईशा देओल र आहना देओलका साथै अजिता र विजेता छन् ।
