प्रादेशिक अस्पताल गौर दोश्रो पटक पनि मधेश प्रदेशमै उत्कृष्ट अस्पताल बनेको छ । मधेश प्रदेश स्वास्थ मन्त्रालय अन्तर्गत न्यूनतम् सेवा मापदण्ड कार्यान्वयन कार्यक्रम अनुसार गरिएको अनुगमन निरीक्षणपछि कार्यसम्पादन मूल्यांकनको आधारमा रौतहट जिल्लाको सदरमुकाम गौरस्थित प्रादेशिक अस्पताल उत्कृष्ट भएको हो ।
स्वास्थ्य निर्देशनालयका निर्देशक सरोजचन्द्र न्यौपानेले तीन दिने वार्षिक समीक्षा गोष्ठीको समापन समारोहमा गौर अस्पताल उत्कृष्ट भएको घोषणा गरे। प्रादेशिक अस्पताल गौर मूल्यांकनको आधारमा कुल ९१ प्रतिशत नम्बर ल्याएर मधेश प्रदेश को ७ वटा प्रादेशिक अस्पतालमध्ये १ नम्बर हुन सफल भएको हो ।
यसअघि आर्थिक वर्ष २०८०–८१ मा पनि प्रादेशिक अस्पताल गौर प्रदेशको उत्कृष्ट घोषणा भएको थियो । अस्पतालले दिइरहेको सेवा, डाक्टर स्वास्थ्य कर्मीको अवस्था, उनीहरूले बिरामीसँग गर्ने व्यवहार, भौतिक पूर्वाधारको अवस्था, एम्बुलेन्स, क्यान्टिन, बिरामीको बेड, अप्रेसन कक्ष, शौचालयको अवस्था, सरसफाइ, अस्पतालले बिरामीलाई दिने सुविधा लगायतको मूल्यांकन गरी छुट्टाछुट्टै नम्बर दिने गरेको छ ।
८० प्रतिशत अंक ल्याएको जलेश्वर अस्पताल दोश्रो र ७८ प्रतिशत अंक ल्याएर सिरहा तेश्रो भएको छ । मधेश स्वास्थ्य विज्ञान प्रतिष्ठान मातहत रहेको प्रादेशिक अस्पताल जनकपुर भने ५० प्रतिशत अंक ल्याएर पुछारमा छन् ।
