पुसमा पार्टीको १५ औं महाधिवेशनको घोषणा गरेको नेपाली कांग्रेसले कार्यसमितिको म्याद भने माघसम्म थपेको छ । लामो रस्साकस्सीपछि अन्ततः नेपाली कांग्रेसले आगामी पुस २६ देखि २८ गते सम्म १५ औं महाधिवेशन गर्ने निर्णय सोमबार गरेको हो ।
नेपाली कांग्रेसको बर्तमान कार्यसमितिको ४ वर्षे कार्यकाल यही मंसिरमा समाप्त हुँदै थियो । कांग्रेसको विधान अनुसार केन्द्रीय समितिले एकवर्ष कार्यकाल थप गर्नसक्ने व्यवस्था रहेको छ ।
त्यही व्यवस्था अनुसार कांग्रेसले अर्को मंसिर सम्म म्याद थप गर्नसक्ने अवस्था थियो । तर कांग्रेसको १५ औं महाधिवेशनको मिति पुसको २६ देखि २८ गते सम्म घोषणा गरेको केन्द्रीय समितिले माघ महिनासम्मलाई कार्यसमितिको म्याद थप गरेको छ ।
कार्यसमितिको म्याद थप गर्ने निर्णयको बेहोरा :
गत भाद्र २३ र २४ गतेको जेन–जी प्रदर्शनका कारण पार्टीका संरचनाहरू ध्वस्त भएको र देशमा विकसित तरल राजनीतिक घटनाक्रमका कारण २०८२ मंसिर २३ गतेभित्र पार्टीको १५ औँ महाधिवेशन गर्न सम्भव नभएको र महाधिवेशन तयारीका क्रममा गर्नुपर्ने सम्पूर्ण कार्यहरू गर्न समेत थप समय आवश्यक भएकोले, यस अवस्थालाई असाधारण स्थिति ठहर गरी नेपाली कांग्रेसको विधानको धारा ४३ बमोजिम पार्टीका सबै तहका पदाधिकारी तथा सदस्यहरूको पदावधि २०८२ मंसिर २४ गते देखि लागू हुने गरी २०८२ माघ मसान्त सम्मको लागि थप गर्ने निर्णय गर्दछ । यो निर्णय निर्वाचन आयोगलाई जानकारी गराइनेछ ।
