नेपाल चिकित्सक संघको ३० औँ केन्द्रीय कार्यकारिणी समितिको निर्वाचनका लागि डा. बद्री रिजाल नेतृत्वको समूहले आफ्नो ६ बुँदे चुनावी घोषणापत्र सार्वजनिक गरेको छ । टिम बद्रीले ‘सुरक्षित सेवा, सुरक्षित पेसा’ भन्ने नारासहित मैदानमा उत्रिएको र चिकित्सकको पेशागत सुरक्षा, दरबन्दी अभाव र सेवा–सुविधा सुधारलाई मुख्य एजेन्डा बनाएको छ । घोषणापत्रमा लामो समयदेखि सम्बोधन हुन नसकेका चिकित्सकका संरचनागत समस्या समाधान गर्ने प्रतिबद्धता व्यक्त गरिएको छ । टिम बद्रीमा अध्यक्षःडा बद्री रिजाल, वरिष्ठ उपाध्यक्षःडा. सञ्जीव तिवारी, महासचिवः डा. विश्वराज दवाडी, कोषाध्यक्षः डा. संयुक्त आचार्य रहेका छन् ।
घोषणापत्र अनुसार कार्यकालभर सरकारी अस्पतालहरूमा १० हजार नयाँ चिकित्सक दरबन्दी सिर्जना गर्न सरकारमाथि दबाब दिने प्रतिबद्धता गरिएको छ । विगत तीन दशकदेखि ओएनएम सर्भे नहुँदा चिकित्सक बेरोजगारी बढेको उल्लेख गर्दै पहिलो वर्षमै २ हजार १ सय दरबन्दी थप्ने पहल गरिने जनाइएको छ । त्यस्तै निजी स्वास्थ्य संस्थामा कार्यरत चिकित्सकहरूले पाउँदै आएको न्यून पारिश्रमिक अन्त्य गर्न सरकारी सरहको वैज्ञानिक न्यूनतम तलबमान लागू गराउन पहल गर्ने प्रतिबद्धता पनि घोषणापत्रमा समेटिएको छ ।
कार्यस्थलमा चिकित्सकमाथि हुने आक्रमण, धम्की तथा दुर्व्यवहार नियन्त्रण गर्न यापिड रेस्पोन्स टिम आर आर टी गठन गर्ने योजना अघि सारिएको छ । आपत्कालीन अवस्थामा उक्त टिममार्फत चिकित्सकलाई तत्काल कानुनी तथा भौतिक सुरक्षा उपलब्ध गराइने बताइएको छ । यसैगरी अध्यक्षका उम्मेदवार डा बद्री रिजालले स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन को प्रभावकारी कार्यान्वयन गर्दै ‘जेल विदआउट बेल’ को व्यवस्था कडाइका साथ लागू गराइने प्रतिबद्धता जनाएका छन् ।
घोषणापत्रमा चिकित्सा शिक्षामा देखिएका विसंगति हटाउन स्नातकोत्तर पीजी अध्ययनका लागि अनिवार्य गरिएको एक वर्षे कार्य अनुभवको व्यवस्था खारेज गर्न पहल गर्ने उल्लेख छ । चिकित्सकको स्वास्थ्य र कार्यक्षमता जोगाउन अन्तर्राष्ट्रिय मापदण्डअनुसारको वैज्ञानिक ड्युटी आवर लागू गर्ने, साथै बर्नआउट व्यवस्थापनका लागि परामर्श सेवा सुरु गर्ने योजना पनि प्रस्तुत गरिएको छ । नेपाल चिकित्सक संघको निर्वाचन तालिकाअनुसार उपत्यकाबाहिर माघ २ र ३ गते मतदान हुनेछ ।
