काठमाडौँ – इरानका सेना प्रमुख अमीर हातामीले इजरायली हवाई हमलामा मारिएका सुप्रिम नेशनल सेक्युरिटी काउन्सिलका सचिव अली लारिजानीको हत्याको “निर्णायक बदला” लिने धम्की दिएका छन्।
हातामीले मंगलबार लारिजानीसँगै अन्य ‘सहिद’हरूको मृत्युको प्रतिशोध लिन आवश्यक कदम चाल्ने बताए। उनले भने, “सही समय र सही स्थानमा अपराधी अमेरिका र रक्तपिपासु जियोनिस्ट शासनलाई यस्तो निर्णायक जवाफ दिनेछौं, जसले अरूका लागि चेतावनीको काम गर्नेछ र उनीहरूलाई आफ्नो कर्मप्रति पछुतो हुने अवस्था सिर्जना गर्नेछ।”
इरानले मंगलबारै सचिव लारिजानीको मृत्यु पुष्टि गरेको थियो। त्यसअघि इजरायलले लारिजानी मारिएको दाबी गरेको थियो।
समाचार एजेन्सी एएफपीका अनुसार, इरानको रिभोल्युशनरी गार्ड्स (आईआरजीसी) ले लारिजानीको मृत्युको प्रतिशोध स्वरूप मध्य इजरायलमा मिसाइल प्रहार गरिएको बताएको छ। आईआरजीसी इरानको नियमित सेनाभन्दा अलग्गै संगठन हो।
