काठमाडौं । नेपाली कांग्रेसका सभापति गगन कुमार थापाले निजी शिक्षा र स्वास्थ्य क्षेत्रमा लगाइएको ३ प्रतिशत समता कर लागू नगर्ने सरकारको निर्णयको स्वागत गरेका छन्।
सामाजिक सञ्जालमार्फत प्रतिक्रिया दिँदै थापाले उक्त व्यवस्था सुरुदेखि नै अनुपयुक्त रहेको भन्दै आफूहरूले निरन्तर प्रश्न उठाउँदै आएको स्मरण गरेका छन्।
उनले निजी विद्यालय र अस्पतालको सेवा लिने सबै नागरिक सम्पन्न नभएको उल्लेख गर्दै धेरैका लागि निजी क्षेत्रको सेवा रोजाइभन्दा पनि बाध्यता भएको बताएका छन्। निजी क्षेत्र देशको शिक्षा र स्वास्थ्य प्रणालीको महत्वपूर्ण साझेदार भएकाले सेवा प्रवाहमै थप शुल्क वा करको भार थप्ने नीति समाधान नभएको उनको भनाइ छ।
थापाले समता शुल्क समानताको नीति नभई असमानता बढाउने व्यवस्था भएको दाबी गर्दै सरकारले आर्थिक तथा सामाजिक यथार्थलाई स्वीकार गरेर निर्णय सच्याएको बताएका छन्।
उनले सरकारको निर्णय कार्यान्वयनका लागि आवश्यक कानुनी र प्रशासनिक प्रक्रिया पूरा गर्न आग्रह गरेका छन्। साथै बिजुलीमा लगाइएको भ्याटलगायत अन्य अव्यावहारिक कर तथा नीतिगत त्रुटिहरू पनि सच्याउँदै आमनागरिकको भावना बुझ्न सरकारलाई आग्रह गरेका छन्।
