प्रसिद्ध हलिउड अभिनेत्री डायन किटनको ७९ वर्षको उमेरमा निधन भएको छ । किटन एनी हल, द गडफादर र फादर अफ द ब्राइडलगायत चलचित्रका लागि परिचित थिइन । अनौठो शैली, जीवन्त व्यक्तित्व र अभिनयको गहिराइले उनलाई आफ्नो पुस्ताको सबैभन्दा विशिष्ट अभिनेत्रीमध्ये एक बनाएको थियो । किटनको निधनले हलिउड र विश्वभरका फिल्म प्रेमीहरूलाई ठूलो धक्का लागेको छ ।
डायन किटनको जन्म १९४६ को जनवरीमा लस एञ्जलसमा भएको थियो । उनको वास्तविक नाम डायन हल थियो । उनको परिवार फिल्म उद्योगसँग जोडिएको थिएन । किटनलाई थिएटर र गायनतिर रुचि थियो । उनले न्यूयोर्कमा सानफोर्ड मेइसनरबाट अभिनयको अध्ययन गर्नुभयो, जसले उनलाई मानव व्यवहारको जटिलता अन्वेषण गर्ने स्वतन्त्रता दियो ।
किटनले १९६८ मा ब्रोडवेमा ‘हेयर’ र ‘प्ले इट अगेन, साम’मा अभिनय गरेकी थिइन् । यसका लागि उनी टोनी अवार्डको लागि मनोनीत भइन् । किनटले १९७० को ‘लभर्स एण्ड अदर स्ट्रेंजर्स’बाट फिल्म उद्योगमा डेब्यू गरेकी थिइन् । तर, उनलाई फ्रान्सिस फोर्ड कोपोलाको ‘द गडफादर’ले चर्चा दिलायो । यसलाई अहिलेसम्मकै सबैभन्दा प्रिय फिल्ममध्ये एक मानिन्छ ।
किटनले १९७० को दशकमा ‘स्लिपर’, ‘लभ एण्ड डेथ’, ‘इन्टेरियर्स’, ‘म्यानहट्टन,’ ‘म्यानहट्टन मर्डर मिस्ट्री’, ‘प्ले इट अगेन, साम’लगायत वुडी एलेनका कयौं फिल्ममा अभिनय गरिन् । यद्यपि, उनको सबैभन्दा स्मरणीय भूमिका ‘एनी हल’मा थियो । यसमा उनको विचित्र र आत्म–मग्न शैली दर्शकहरूले सधैं सम्झनेछन् । किटनले आफ्नो करियरमा चार ओस्कर नामांकन प्राप्त गर्नुभयो भने ‘एनी हल’को लागि पहिलो ओस्कर जितेकी थिइन् ।
