नेकपा एमालेका नेता महेश बस्नेतले अन्तरिम सरकारका प्रधानमन्त्री सुशीला कार्की र पूर्वराष्ट्रपति विद्यादेवी भण्डारीबीच केपी शर्मा ओलीलाई पक्राउ गर्नेबारे कुराकानी भएको दाबी गरेका छन् । बस्नेतले सामाजिक सञ्जालमा बिहीबार स्टाटस लेख्दै दुई दिनअगाडि नै पूर्वराष्ट्रपति विद्या भण्डारी र प्रधानमन्त्री सुशीला कार्कीबीच भएको भनिएको वार्तामा पनि केपी ओलीलाई गिरफ्तार गर्ने कुरा भएको रहस्य खुलेको उल्लेख गरेका छन् ।
उनले बुधबार पत्रकार सम्मेलनमा ईश्वर पोखरेलले अध्यक्ष केपी ओली भदौ २३–२४ गतेको घटनाको छानविन गर्न गठित आयोगमा बयानका लागि जानैपर्ने भनेको उल्लेख गर्दै कार्की र भण्डारीबीचको सहमति भएको दाबि गरेका छन् । उनले लेखेका छन् – ‘हिजोको पत्रकार सम्मेलनमा ईश्वर पोखरेलले पत्रकारहरूलाई भन्नुभयो– तपाईंहरूले एउटा कुरा सोध्नै भुल्नुभयो, किन हाम्रो अध्यक्ष आयोगमा बयान दिन जानुभएन ? म भए जान्थेँ, उहाँ पनि जानैपर्छ । यसबीच अर्को षडयन्त्रको खेल पनि बाहिर आएको छ ।’
उनले केपी ओली गिरफ्तार भन्ने मिडिया ट्रायल सबै कुरा एउटै दिशातिर संकेत गरेका छन् । उनले भनेका छन् – ‘उनीहरूको उद्देश्य हो महाधिवेशन भाड्ने, आतंक फैलाउने, सहभागिता घटाउने । अन्तिम चरणमा केपी ओलीको लोकप्रियता कमजोर पार्ने, महाधिवेशनमा चुनाव भएमा सके हराउने नसके भोट घटाउने हो । तर, उनीहरूले बिर्सिन नहुने कुरा के हो भने एमाले सबै प्रकारका षड्यन्त्र चिर्न सक्षम छ ।’ अध्यक्षलाई दबाब दिने वा गिरफ्तार गर्ने कुनै पनि चाल कदापि सफल नहुने चेतावनी उनले दिएका छन् ।
