टाइगर ग्रुप अफ पोखरा नेपालको आयोजना हुने छैटौं टाइगर कप राष्ट्रिय तथा अन्तर्राष्ट्रिय आमन्त्रित क्लव च्याम्पियनसिप आगामी माघ ९ देखि १७ गतेसम्म हुने भएको छ । पोखरा रंगशालास्थित भलिबल कोर्टमा हुने च्याम्पियनसिपमा ४ विदेशी टोलीसहित १४ टोलीले सहभागिता जनाउने टाइगर ग्रुपले जानकारी दिएको छ । पुरुष र महिलातर्फ ७–७ टोलीले सहभागिता जनाउने टाइगर ग्रुपका अध्यक्ष नारायणप्रसाद शर्माले जानकारी दिए ।
पुरुषतर्फ माल्दिभ्सको माल्दिभ्स भलिबल एशोसियसन र भारतको गुजरात भलिबल क्लब विदेशी टोलीको रुपमा रहनेछ ।स्वदेशीको टोलीको रुपमा नेपाल पुलिस क्लब, सशस्त्र प्रहरी बल एपिएफ, त्रिभुवन आर्मी क्लब, गण्डकी प्रदेश र पर्वत जिल्ला भलिबल संघ छन् । महिलातर्फ युनाईडेट प्यासन भलिबल क्लब, थाईल्याण्ड र थाइल्याण्ड क्वीन्स विदेशी टोलीको रुपमा सहभागी छन् ।
तीन विभागीयसहित न्यू डायमण्ड युथ स्पोट्र्स र एभरेष्ट भलिबल क्लब महिलातर्फ सहभागी छन् । यसपटक गत वर्षको तुलनामा पुरस्कार राशीमा वृद्धि गरिएको छ । पुरुष र महिला दुवैतर्फ विजेता हुने टोलीले ६ लाख ६६ हजार ६६६ रुपैयाँ र उपविजेता हुने टोलीले ३ लाख ६६ हजार ६६६ रुपैयाँ पाउनेछन् । तेस्रो हुने टोलीलाई एक लाख ६६ हजार ६६६ रुपैयाँ प्रदान गरिने आयोजकले जनाएको छ ।
सर्वोत्कृष्ट हुने खेलाडीले २६ हजार ६६६ र विधागततर्फ उत्कृष्ट हुने खेलाडीले ११ हजार ६६६ रुपैयाँ प्राप्त गर्नेछन् । प्रतियोगिता आयोजना गर्दा करिब एक करोड ८० लाख खर्च लाग्ने अध्यक्ष शर्माले जानकारी दिए । खेल हेर्नका लागि पहिलोपटक सिजनल टिकटको व्यवस्था गरिएको छ । ३ हजार ५ सय रुपैयाँमा दर्शकले प्रतियोगिताका सबै खेल हेर्न पाउनेछन् ।
