नेपाली कांग्रेसका सभापति शेरबहादुर देउवाले महामन्त्रीद्वय गगन थापा र विश्वप्रकाश शर्मालाई पार्टी नफुटाउन आग्रह गरेका छन् । पार्टी विभाजनतर्फ उन्मुख भईरहेका बेला आज बिहान भएको छलफलमा सभापति देउवाले महामन्त्रीद्वयसँग उक्त आग्रह गरेका हुन् । पार्टीको एकता जोगाउनका लागि आफु दृढ रहेको बताउँदै सभापति देउवाले प्रतिनिधि सभाको निर्वाचनमा अरु नै नेताको हस्ताक्षर गर्ने अधिकार दिन पनि आफु तयार रहेको बताएको कांग्रेस प्रवक्ता प्रकाश शरण महतले जानकारी दिए ।
“सबैको सहमतिले केन्द्रीय समितिले गरेको निर्णय अनुसार देउवाको हस्ताक्षरमा टिकट पठाएको हो । हस्ताक्षरकै कारणले सहमतिमा अप्ठेरो पर्छ भने पार्टी एकताका लागि मेरो हस्ताक्षर महत्वपूर्ण कुरो होईन । पार्टीको जुनसुकै नेताहरुलाई हस्ताक्षर दिएर पनि पार्टी एक ठाउँमा रहन सक्छ भने मेरो तर्फबाट समस्या छैन ।” देउवाको भनाई उद्यृत गर्दै महतले भने ।
देउवाको भनाइपछि महामन्त्रीद्वय विशेष महाधिवेशन पक्षधर साथीहरूसँग छलफल गर्नुपर्छ भनेर देउवा निवासबाट बाहिरिएका छन् । महामन्त्रीद्वयको अगुवाईमा काठमाडौंको भृकुटी मण्डपमा ४ दिनदेखि नीति र नेतृत्व परिवर्तन गर्ने भन्दै विशेष महाधिवेशन भईरहेको छ । महाधिवेशनमा नयाँ नेतृत्व चयनका लागि भन्दै उम्मेदवारको मनोनयन दर्ता कार्य पनि चलिरहेको छ ।