नेपाली कांग्रेसको केन्द्रीय कार्यसम्पादन समितिको बैठक आज बस्दैछ । समसामयिक राजनीति, संसदीय दलको नेता चयन , पार्टीले मंगलवारदेखि शुरु गरेको जरा अभियान लगायत विषयमा छलफल गर्न बैठक बस्न लागेको हो ।
दिउँसो २ बजे बस्ने कार्यसम्पादन समितिको बैठक अघि केन्द्रीय अनुशासन समितिको बैठक पनि बस्दैछ । अनुशासन समितिको बैठकले पार्टीको समानान्तर गतिविधिमा सक्रिय रहेको भन्दै पूर्व कार्यवाहक सभापति पूर्णबहादुर खड्कालाई कारबाहीको सिफारीस गर्ने बताईएको छ । खड्काले गत चैत्र ३० गते कार्यवाहक सभापतिकै हैसियतमा दोस्रोपटक वक्तव्य जारी गरेपछि कांग्रेसले कारबाहीको तयारी गरेको हो ।
अनुशासन समितिले यसअघि नै खड्कालाई कार्यवाहक सभापतिको हैसियतमा पार्टीको लेटरहेड दुरुपयोग नगर्न सचेत गराउन निर्णय गरेको थियो । चैत १८ गतेको बैठकले खड्काको नाम उल्लेख नगरीकन अब उप्रान्त लेटरहेड दुरुपयोग भए नेपाली कांग्रेसको विधान,२०१७ (संशोधनसहित) र पचलित नेपाल कानुन बमोजिम कारबाही प्रक्रिया अगाडि बढाउने निर्णय गरेको थियो ।
नयाँ सरकार बनेलगत्तै पूर्वगृहमन्त्री रमेश लेखक पक्राउको विरुद्धमा खड्काले कांग्रेसको लेटरहेड प्रयोग गरी धारणा सार्वजनिक गरेका थिए । कार्यवाहक सभापतिकै हैसियतमा पूर्णबहादुर खड्काले सोमबार पार्टीको आधिकारिकतासम्बन्धी विवाद अदालतमा विचाराधीन रहेको अवस्थामा वर्तमान कार्यसमिति नै ‘तथाकथित विशेष महाधिवेशनबाट बनेको’ आरोप लगाएका थिए । वक्तव्यमार्फत क्रियाशील सदस्यता खारेज गर्ने विषय स्वीकार्य नभएको खड्काले जिकिर गरेका थिए ।
त्यसलगत्तै बोलाईएको अनुशासन समितिको बैठकले नेता खड्कालाई कारवाही हुने सम्भावना बढेको हो ।
