काठमाडौँ । सरकारले जेन जेड आन्दोलनसँग सम्बन्धित जाँचबुझ आयोगको प्रतिवेदन कार्यान्वयनका क्रममा सुरक्षा संयन्त्रसँग जोडिएका पक्षहरूबारे अध्ययन गरी सुझाव दिन तीन सदस्यीय समिति गठन गरेको छ ।
बुधबार बसेको मन्त्रिपरिषद् बैठकले उक्त निर्णय गरेको हो । सरकारका प्रवक्ता तथा शिक्षामन्त्री सस्मित पोखरेलका अनुसार सुरक्षा निकायको भूमिकासम्बन्धी पक्षलाई केन्द्रमा राख्दै प्रतिवेदन कार्यान्वयनका लागि आवश्यक अध्ययन र सिफारिस गर्न समिति गठन गरिएको हो ।
गठन गरिएको समितिको नेतृत्व उच्च अदालतका पूर्वन्यायाधीश प्रेमराज कार्कीले गर्नेछन् । समितिमा सशस्त्र प्रहरी बलका पूर्व अतिरिक्त महानिरीक्षक सुबोध अधिकारी र नेपाल प्रहरीका पूर्व अतिरिक्त महानिरीक्षक टेकप्रसाद राई सदस्यका रूपमा रहने व्यवस्था गरिएको छ ।
गत भदौ २३ र २४ गते भएको जेन जेड आन्दोलनसम्बन्धी घटनाबारे गौरीबहादुर कार्कीको नेतृत्वमा गठित जाँचबुझ आयोगले तयार पारेको प्रतिवेदन कार्यान्वयनका सन्दर्भमा सुरक्षा संरचनासँग सम्बन्धित पक्षको विस्तृत अध्ययन गरी आवश्यक सुझाव दिन समिति जिम्मेवार रहने निर्णयमा उल्लेख गरिएको छ ।
