कोशी प्रदेशका पूर्वमुख्यमन्त्री एवम् नेपाली कांग्रेसका नेता केदार कार्कीले विषेश महाधिवशेनले गगन थापालाई सिंगो कांग्रेसको सभापति बनाएको भन्दै दास, लास, अश्लील, अराजक, अनुशासनहीन कविलाको नाइके नबनाएको बताएका छन् । समाजिक संजाल मार्फत कार्कीले पार्टी सदस्यताको विषयमा पछिल्लो समय बढेको विवादपछि कारबाहीको धम्की आएको भन्दै उनले विशेषबाट थापालाई सभापति बनाए पनि कविलाको नाइके नबनाएको बताएका हुन् ।
उनले पञ्चायतको निरंकुश सरकारले धम्की दिँदा, कठघरामा उभ्याउँदा, आर्मी र पुलिसको बुटले शरीरका अंग–अंगमा बजार्दा, सँगै भएको साथीलाई आँखाअगाडि गोली ठोक्दा नेपाली कांग्रेस जिन्दावाद, प्रजातन्त्र जिन्दावाद, जय नेपाल भनेर नारा लागाउने, माओवादीले छानी–छानी रुखमा बाँधेर घाँटी रेटेर मार्दा बीपी, सुवर्ण शमशेर, किसुनजी, गिरिजा प्रसादहरूले दिएको सदस्यता इजरामा बाँधेर सुरक्षित राख्नेहरूलाई संवाद होइन कारबाहीको धाक देखाउनु अतिवाद भएको बताएका छन् ।
कार्कीले सामाजिक सञ्जालमा लेखेका छन् – ‘हामीले विशेष महाधिवेशनबाट सिंगो कांग्रेसको सभापति बनाएको हो । दास, लास, अश्लील, अराजक, अनुशासनहीन कविलाको नाइके बनाएको होइन । संवाद गर्नुस्, समाधान निकाल्नुस्, जिम्मेवार हुनुस् । सबै मिलेर एक नेपाली कांग्रेसको नियमित महाधिवेशन गरौँ । संवाद नै समाधानको उपाय हो भन्ने थाहा होला नि ।’
