नेपालको हिमाली क्षेत्रमा पाइने बहुमूल्य प्राकृतिक सम्पदा शिलाजित प्रयोग गरेर नेपालमा नै उत्पादन गरिएको इनर्जी ड्रिङ्क ‘भिट सिला’ सोमबारबाट बजारमा आउने भएको छ । पहिलोपटक हिमालयन शिलाजितमा आधारित इनर्जी ड्रिङ्क ‘भिट सिला’ भिटसिला फुड्स एण्ड वेभरेज प्रालि उत्पादन गरेको हो ।
कम्पनीका अनुसार, आधुनिक पेय विज्ञान र हिमालयन शिलाजितको पौराणिक एवं प्राकृतिक महत्त्वलाई एउटै उत्पादनमा समेटिएको यो विश्वकै सम्भवतः पहिलो सरकारी स्वीकृति प्राप्त शिलाजित इनर्जी ड्रिंक हो । विभिन्न क्षेत्रमा अनुभव बटुलेका तीनजना नेपाली उद्यमीहरूको संयुक्त लगानी र सोचबाट यो ब्रान्डको साउन १८ गते औपचारिक रूपमा सार्वजनिक गरिने भएको हो ।
यो ब्रान्डको सुरुवात तीन नेपाली उद्यमी—नरेन्द्रबहादुर चन्द, विवेक सिटौला र कविन्द्र प्रसाईँको संयुक्त लगानी तथा सोचबाट भएको हो । कम्पनीमा अन्तर्राष्ट्रिय साझेदारका रूपमा लन्डनकी डा. हाना जोडिएकी छन्, जसले निर्देशक तथा अन्तर्राष्ट्रिय व्यापार प्रवद्र्धकका रूपमा विश्वव्यापी बजार विस्तारको नेतृत्व गर्नेछन् ।
‘मेड इन नेपाल’ लाई विश्वभर पु¥याउने लक्ष्य राखिएको यस पेय पदार्थको प्राथमिक निर्यात बजार यूके, अमेरिका, युरोप र मध्यपूर्व हुनेछन् । यसै योजनाअन्तर्गत लन्डनमा कम्पनी दर्ता भइसकेको छ भने आगामी तीन महिनाभित्र बेलायतमै उत्पादन सुरु गर्ने तयारी भइरहेको कम्पनीका अध्यक्ष विवेक सिटौलाले जानकारी दिए ।
भिट सिला केवल एउटा पेय पदार्थ मात्र नभई नेपालको शिलाजितलाई विश्वव्यापी ब्रान्ड बनाउने अभियानका रूपमा अगाडि बढाउने र भविष्यमा शिलाजितमा आधारित अन्य स्वास्थ्यवद्र्धक र फङ्सनल वेभरेजहरू पनि बजारमा ल्याउने कम्पनीको योजना रहेको बताइएको छ ।
