महोत्तरीको गौशाला नगरपालिकाले बुधबार आएको बाढीबाट प्रभावितहरुलाई १० लाख रुपैयाँ सहयो गरेको छ । नगरपालिकाले एक प्रेस विज्ञप्ति जारी गर्दै नगरपालिकाको तर्फबाट प्रधानमन्त्री राहतकोषमा तत्काल रू. १० लाख रुपैया जम्मा गरिएको जनाएको हो ।
अहिलेको कठिन परिस्थितिमा विपद् प्रभावित क्षेत्रका नागरिकहरूको पीडामा मलम लगाउन नेपाल सरकारबाट गरिने सबै प्रकारका प्रयासहरूमा गौशाला नगरपालिकाले साथ र सहयोग रहने प्रतिबद्धता पनि ब्यक्त गरेको छ ।
बुधबार भोटेकोशी नदीमा आकस्मात आएको बाढीको कारण रसुवा, नुवाकोट, धादिङ, चितवन लगायतका जिल्लाहरूमा भएको ठूलो जन-धनको क्षतिप्रति दुःख व्यक्त गर्दै नगरपालिकाले नेपाल सरकारद्वारा गरिने खोज, राहत र उद्दारका कार्यहरूमा आवश्यक पर्ने सम्पूर्ण सहयोग पुर्याउन तत्पर रहेको स्पष्ट पारेको छ ।
”विशेष गरी विपद्को समयमा थप जोखिममा पर्ने गर्भवती तथा सुत्केरी महिला, बालबालिका, ज्येष्ठ नागरिक र अपाङ्गता भएका व्यक्तिहरूलाई पहिलो प्राथमिकतामा राखी उद्दार र पुनर्स्थापनाको व्यवस्था मिलाउन सम्बन्धित सबै पक्षको विशेष ध्यानाकर्षण गराउन चाहन्छु। ” नगरप्रमुख डा. दिपेन्द्र महतोद्वारा हस्ताक्षरित विज्ञप्तिमा भनिएको छ ।
हालको मौसमी प्रतिकूलता र सम्भावित विपद्को जोखिमलाई मध्यनजर गर्दै हाम्रो गौशाला नगरपालिका क्षेत्रभित्रका नदी तथा खोला किनार आसपास बसोबास गर्ने नगरवासीहरुलाई उच्च सतर्कता अपनाउन, सम्भावित बाढी वा डुबानको जोखिमप्रति सजग रहन पनि नगरपालिकाले अनुरोध गरेको छ ।
