काठमाडौँ । रोल्पाको थवाङ गाउँपालिका-१ सल्यापस्थित कच्ची सडक खण्डमा आज दिउँसो भएको जिप दुर्घटनाको घटनाबारे छानबिन गर्न गृह मन्त्रालयले चार सदस्यीय समिति गठन गरेको छ।
मन्त्रालयको शान्ति सुरक्षा तथा अपराध नियन्त्रण शाखाले जारी गरेको विज्ञप्तिअनुसार सचिवस्तरीय निर्णयबाट लुम्बिनी प्रदेश प्रहरी कार्यालय तुलसीपुरका प्रहरी उपरीक्षक यादव ढकालको संयोजकत्वमा समिति गठन गरिएको हो। समितिलाई घटनाको सत्य तथ्य अध्ययन गरी तीन दिनभित्र प्रतिवेदन पेश गर्ने जिम्मेवारी तोकिएको मन्त्रालयले जनाएको छ।
समितिमा जिल्ला प्रहरी कार्यालय रोल्पाका प्रहरी नायब उपरीक्षक, सशस्त्र प्रहरी बल रोल्पाका सशस्त्र प्रहरी नायब उपरीक्षक तथा जिल्ला प्रशासन कार्यालय रोल्पाका प्रशासकीय अधिकृत सदस्य रहेका छन्।
गृह मन्त्रालयले समितिलाई दुर्घटना हुनुका कारण, सम्भावित लापरवाही वा कमजोरीको पहिचान गर्न तथा आगामी दिनमा यस्ता घटना न्यूनीकरणका लागि आवश्यक सुझाव पेश गर्न कार्यादेश दिएको छ।
रुकुमबाट रोल्पाको जलजलातर्फ जाँदै गरेको जिप दिउँसो करिब २:५० बजे कच्ची सडकबाट करिब ८ सय मिटर तल खस्दा २० जनाको मृत्यु भएको छ भने एक जना घाइते भएका छन्। दुर्घटनापछि उद्धार तथा आवश्यक समन्वय कार्य जारी रहेको सम्बन्धित निकायले जनाएका छन्।
